ام يوسف heart emoticon
الأم مو بس وجع ولادة ..الأم وجع حياة
وجع تفاصيل انت ما تنتبهلها ولا حتى "هي"
ولا حتى آني
بس ربك يعرفها
لذلك خله كل بساتين السحر جوة رجليها...

أمي مثل كل الأمهات ...
يعني اكبر مصيدچي ما يگدر يصوب النفاضة الي تنشمر بحرفية من تسوي مكسورة !
يعني لازم تحطلك كشمش بالبرياني وتگلك انت لگطها وطلعها..!
يعني ضروري تسوي طرشانة مرة بالشهر حتى لو تگضيها جبن وكرفس "عادي"
يعني لازم توصلك فد سبع عيطات مدوية أثناء زيارتها الأستطلاعية المفاجئة لغرفتك الي كل ما يحاول يمد التيشرت راسه تجره القمصلة وتخبزه بالگاع..!
يعني بروفيسورة في فتح البيبان المقفلة ودكتورة في المباغتة وماجستير في الخدع التكتيكية لكشف أي نية مبيتة "للتسخت" أثناء الأمتحانات ..
يعني سماعة التلفون "الثانية" بزمن الخطوط الأرضية وحساب فيسبوك وهمي في زمن السوشال ميديا وأكبر هكر في العالم ما يلحگها اذا رادت تعرف وية منو دتحچي ..!
يعني احلى وحدة چانت بالكلية وأشطر وحدة چانت بالمدرسة وأكثر وحدة بأهلها تسمع الكلام بس شوية من كبرت صارت "عصبية"
يعني أكثر وحدة تحچي عليك بين أهلها بس تتخبل وبعد متشوف من الضغط اذا أحد گاللها "اي والله مو خوش ضنا" !
يعني سلسلة الدردمة المستمرة الي بالمدارس على "القراية" وبالعطلة الصيفية على "سويلك شغلة مفيدة " !
يعني الحملة الأيمانية في رمضان وتقصي الحقائق وراء صيامك "النص كم" وصلاتك الي تلثترباع..!
يعني كل ما تفوت الغرفتها بأي وقت تلگاها "مفتحة" تفكر بيك ..
يعني تطلع الصبح وغرفتك مگلوبة ترجع تلگاها مرتبة..
يعني فجأة تلگة المشروع المطلوب منك بدرس الفنية جاهز ومركون بزاوية الغرفة !
يعني يم ماعون "الشجر" الي ما تحبه تلگة صحن "مخلمة " تحبة !
يعني ما تحتاج تگول منو الي خيطلك هدوم العيد ..
ولا محتاج تلبس جواريب لبستها قبل يوم !
ولا تحتاج طبيب وعندك عالمة بكل أنواع الأمراض وعلاجك بچيس أدويتها...
وبدشداشتها المبللة اثر غسل ماعونك وتنظيف هدمتك
وتلميع مكانك
وشوية وجع انت نطيتهياه من غلطت بحقها ..
‫#‏احبج‬ ماماتي

shahrazad M. Alkhalidi